Озмуни ҷумҳуриявии «Тоҷикистон-Ватани азизи ман» дар ноҳияи Тоҷикобод.

            Дар толори бахши фарҳанги ноҳияи Тоҷикобод бо иштироки наврасону ҷавонони боистеъдод Озмуни ҷумҳуриявии «Тоҷикистон-Ватани азизи ман» дар бахшҳои гуногуни ҳунарӣ доир гардид. Тибқи иттилои масъулин озмуни мазкур аз тарафи Вазорати фарҳанги Ҷумҳурии Тоҷикистон дар якҷоягӣ бо Кумитаи телевизион ва радиои назди Ҳукумати Ҷумҳурии Тоҷикистон ташкил гардида, он ба муносибати сазовор пешвоз гирифтани ҷашни 30 – солагии Истиқлолияти давлатии Ҷумҳурии Тоҷикистон ва бо мақсади дарёфти истеъдодҳои нави соҳаи санъат ташкил гардидааст.

 

           Ҳадаф аз он баланд бардоштани мақому маҳорати касбӣ, тақвият бахшидан ба касбияти баланди ҳунари иҷрокунандагӣ ва эҷоди мусиқии нав, инчунин таълифи ашъори баландғояи ватандӯстона, дарёфти беҳтарин намунаҳои оҳанг ва сурудҳои тараннумгари дастовардҳои замони Истиқлолияти давлатӣ, саҳми Президенти Ҷумҳурии Тоҷикистон, муҳтарам Эмомалӣ Раҳмон дар эъмори давлатдории навини тоҷикон ва тарғибу ташвиқи анъанаҳои арзишманди миллию мероси пурғановати ниёгон арзёбӣ гардид.

            Дар озмун ҷавонон ва наврасон шеъру суруд ва оҳангҳои нав, асарҳои мусиқии композиторони ватанӣ ва ҷаҳонӣ, намунаҳои мусиқии анъанавӣ, академӣ ва муосири тоҷикро, ки ба талаботи низомнома ва шартҳои озмун ҷавобгӯянд, пешниҳод намуданд. Аз рӯи наминатсияҳои сароянда, навозанда, оҳангсоз, шоир ва ровӣ чанд нафар аз иштирокдорон ба даври минтақавӣ роҳхат гирифтанд.

  

            Ёдовар мешавем, ки озмун дар се давр, яъне даври аввал дар шаҳру ноҳияҳо, даври дуввум дар марказҳои Вилояти Мухтори Кӯҳистони Бадахшон, вилоятҳои Хатлону Суғд ва шаҳри Душанбе ва даври сеюм дар пойтахти кишвар бо супоридани ҷоизаву дипломҳо ва мукофотҳои пулӣ баргузор  мешавад. Ғолибони озмун инчунин ҳуқуқи иштирок дар чорабиниҳои сатҳи ҷумҳуриявӣ ва байналмилалиро пайдо мекунанд. Ба барандаи Шоҳҷоизаи озмун 50 000 сомонӣ, ҷойи якум – 30 000 сомонӣ, ҷойи дуюм – 20 000 сомонӣ ва ҷойи сеюм -15 000 сомонӣ мукофоти пулӣ пешбинӣ шудааст.

 

            Баргузории озмуни  мазкур дар даврони бархурди тамаддунҳо ва ҷаҳонишавии фарҳангҳо ба  тарбияи худшиносиву хештаншиносии миллӣ ва тарбияи маънавии ҷомеа махсусан ҷавонон басо муҳим арзёбӣ гардид.

            Дар ҷамъбаст аз тарафи Мақомоти иҷроияии маҳаллии ҳокимияти давлатии ноҳияи Тоҷикобод ба ғолибон ифтихорномаҳо тақдим гардид.