КӮМАКҲОИ ХАЙРИЯВӢ БАҲРИ ПЕШГИРИИ БЕМОРИИ КОРОНАВИРУС

            Дар доираи дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади дастгирии табибон ва беморони мубталои коронавирус COVID-19 аз тарафи Хадамоти Оғохон  оид ба тандурустӣ дар Тоҷикистон ба беморхонаҳои марказии шаҳри Роғун, ноҳияи Файзобод ва навоҳии Рашт аз ҷумла Тоҷикобод кӯмаки хайриявӣ расонида шуд.

              Бо мақсади пешгирӣ ва муолиҷаи  бемории мазкур Хадамоти Оғохон  оид ба тандурустӣ дар Тоҷикистон дар доираи Лоиҳаи «Беҳсозии ҳамҷояи ҳифзулсиҳат ва макони зист» дар минтақаи Рашт бо маблағгузории Ҳукумати Шветсария, бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон мақомотҳои иҷроияи давлатӣ чунин кумакҳоро ба роҳ мондааст. Кӯмаки мазкур, ки иборат аз як қатор маводҳои зарурӣ, аз қабили 1050 дона хилъатҳои муҳофизатии тиббӣ 8050 адад ниқобҳои тиббӣ, 7000 дастпушакҳои тиббӣ 3500кг хокаи хлор, 700 литр маҳлули спиртии тиббӣ, 14 адад ҳароратсанҷи фосилавӣ, 350 адад ҳароратсанҷи симобӣ, 210 ҷуфт мӯзаҳои резинӣ, 210 адад айнакҳои муҳофизатӣ. 70 адад либосҳои муҳофизатии махсуси тиббӣ, 70 адад дорупошак ва 350 бастаи рахти хоб бо маблағи 614 ҳазор сомонӣ ба муассисаҳои тандурустии  ҳафт шаҳру ноҳияи тобеи  ҷумҳурӣ, аз ҷумла шаҳри Роғун, ноҳияҳои Файзобод, Нуробод, Сангвор, Рашт, Тоҷикобод, ва Лахш расонида шуд. Ёдовар мешавем, ки Иқдоми мазкурро кормандони муассисаҳои тиббӣ хуш истиқбол намуда,  ба Ҳукумати Ҷумҳурии Тоҷикистон ва Ҳукумати Швейтсария барои дастгириашон дар чунин марҳилаи ҳассос изҳори миннатдорӣ намуданд.

                Кумакҳои ташкилотҳои ҷамъиятӣ ва фаъолнокии онҳо дар корҳои пешгирикунанда, баҳри пешгирӣ  ва муолиҷаи бемории сироятии коронавирус  мусоидат менамояд. Қобили зикр аст, ки хадамоти Оғохон  оид ба тандурустӣ дар Тоҷикистон яке аз агентиҳоест, ки равандҳои тандурустии шабакаҳои Бунёди Оғохонро дар Тоҷикистон амалӣ мегардонад.