ДАВИ МИЛЛӢ ВА МАРАФОНИ ВЕЛОСИПЕДРОНӢ ДАР ТОҶИКОБОД
15 май дар шаҳраки Тоҷикобод бахшида ба рӯзи Ҷавонони Тоҷикистон бо иштироки доираи васеи ҷавонону наврасон ва кормандони сохторҳои гуногун мусобиқаи дави миллӣ ва марафони велосипедронӣ доир гардид.
Дар мусобиқаи давидан ва велосипедронӣ корманди мактаби варзишӣ Наврузов Аҳмад аз ҳама пештар ба марра расида, ҷои аввалро сазовор гардид. Ҷойҳои дуюмро кормандони Хадамоти оташнишонӣ соҳиб гардиданд. Дар сабқати давидан ва дучархаронӣ дар байни варзишгарони синни аз 40 боло корманди шуъбаи маорифи ноҳияи Тоҷикобод Шералиев Ислом дар давидан барандаи ҷойи аввал, кормандони мақомоти иҷроияи ноҳия Орифҷон Иброҳимов ва Бурҳониддин Мухтадоев ҷойҳои дуюму сеюмро сазовор гардиданд.
Дар ҷамъбасти мусобиқаи дави миллӣ ва марафони велосипедронӣ ғолибони мусобиқаҳо аз номи раиси ноҳия Қадриддин Фақерзода бо ифтихорнома ва тӯҳфаҳои мақомоти иҷроия ва бахши кор бо ҷавонон ва варзиш қадрдонӣ карда шуданд.
Мусобиқаи мазкур дар доираи чорабиниҳо бахшида ба рӯзи Ҷавонони Тоҷикистон бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон роҳандозӣ гардид.
